大家平日出街想去邊都話咁易，但對於視障朋友嚟講，就好需要導盲犬嘅幫忙。黛安知道，星群的士同香港導盲犬服務中心合作，推出首支導盲犬友善的士車隊，以後出街就方便好多啦！公關姐妹話，全港80架星群多用途的士MPT，即日起歡迎導盲犬上車，車身仲貼有「歡迎導盲犬Guide Dogs Welcome」嘅標誌做識別，而星群司機都會接受訓練，學習導盲犬嘅知識，好貼心啊！
香港導盲犬服務中心主席張偉民話，其實依家有好多交通工具，都未必可以服務到視障人士嘅需要，今次獲得星群的士積極參與同推動無障礙交通，實在好開心，畢竟的士係服務身障人士嘅個人交通工具。佢又話，導盲犬全部都經過嚴格訓練，其實比人更專心，on duty唔會輕易受干擾，所以大家要對導盲犬有信心！
星群的士執行董事鄭敏怡就話，希望透過新服務，可以喺業界起示範作用，消除大眾同司機對導盲犬嘅誤解。
